El
cuidu ye una actividá qu'esiste desque esiste la humanidá ya sobre la
qu'inflúin les circunstancies socioculturales carauterístiques de cada llugar y
momentu de la hestoria. Dientro d'esi contestu sociocultural, les creencies (y
dientro d'elles la relixón) asina como el conceutu dominante d'enfermedá en
cada momentu van ser determinantes p'analizar la evolución del cuidu.
Dende
los sos oríxenes, los cuidos tuvieron direutamente venceyaos a la satisfaición
de les necesidaes más básiques pal caltenimientu de los individuos (como
l´alimentación, la busca de seguridá, d´abelugu o abrigu…) y venceyaes a dos
periodos de la vida nos que la dependencia d'otres persones rescampla: la
infancia y la vieyera. Poro, los primeros antecedentes de cuidu tán
rellacionaos col entamu del ciclu vital, cola atención del partu y de caúna de
les nueves incorporaciones a la comunidá, enfotándose nel prestu de les
necesidaes básiques. Si amás consideramos que les primeres civilizaciones
desenvolvíen la so actividá nun ambiente contrario, nel que'l númberu
d'enemigos naturales de la raza humana yera considerable, les diferencies
físiques ente homes y muyeres favorecieron una división sexual del trabayu: los
homes emplegáronse nel trabayu esternu que rique una mayor potencia física, y
les muyeres dedicáronse al ámbitu cercanu, especialmente de too lo rellacionao
colos cuidos, circunstancia que marcó l'aportar de la hestoria.
Semeya
1. Iatreia, Asclepeia y Xenodoquio
Esta
xuntanza de la muyer col cuidu y l'entamu del ciclu vital favorez l'apaición de
muyeres que se dediquen al cuidu más allá de la so casa. Asina se conoz que nel
imperiu romanu había muyeres qu'emprestaben curiaos mientres el partu y al
naciellu. Al igual asocedía na Edá Media, dómina na que se reconocía a les
muyeres como cuidadores poles sos peculiaridaes rellacionaes cola fecundidá,
por ser portadora de cada nuevu miembru de la familia, responsables del
allumamientu y encargaes de protexer y alimentar al nuevu retueyu.
Tamién
dende los sos oríxenes, el conceutu d'enfermedá o defeutu físicu tenía un
componente máxicu, deriváu del sistema de mitos, creencies y supersticiones que
l'home antiguu inventa, a manera de control ideolóxicu p'amenorgar la medrana,
al envís d´esplicar los fenómenos de la naturaleza que nun ye a esplicar. Nesi
contestu, la enfermedá ye interpretada como un mal producíu polos espíritos o
un castigu de los dioses. Cada enfermedá diba xunida a la superstición,
l'enfermu yera atendíu por familiares y estos recurríen a la figura del bruxu,
mestrón o xamán.
Estes
figures, bruxes, mestrones… combinen una serie de rituales cola so capacidá pa
reparar nos fenómenos naturales, recoyendo información de los casos atendíos
p´afitala nos casos nuevos. D'esta miente, na atención de la enfermedá
predomina'l pensamientu máxicu.
Nesti
contestu, la ilesia católica, aprovechando que'l pensamientu cristianu promueve
l'altruísmu, la caridá y l'atención a los enfermos y desvalíos como camín a
siguir p'algamar la salvación eterna, empieza a monopolizar los cuidos,
afaciendo y tresformando los ritos y enfotos venceyaos, por aciu´l pensamientu
máxicu, a la enfermedá en cuestiones relixoses. Esto ye: caltiense'l
pensamientu máxicu pero tresforma l'enfoque; camuda la forma, pero nun el
fondu.
Asina,
na Edá Media los hospitales o instituciones zarraes xurden cerca o nunu de los
llaterales de les ilesies y catedrales que van faciendo col exerciciu de los
nobles y ricos d'esa caridá predicada pola ilesia como camín de salvación.
Estes instituciones, dedicaes a l'atención de les persones más probes de la
sociedá de la dómina, tuvieron un importante papel mientres les grandes
epidemies qu'afararon Europa. A les innumberables faltes qu'atropaben estos
cortiles hai que xunir una dieta desaparente qu'aniciaba l'apaición
d'enfermedaes carenciales, desconocíes na dómina, a les que se xuntaben les
enfermedaes de la piel, amalecíes polos parásitos.
Los
cuidos nesos centros emprestábenlos los relixosos o relixoses de distintos
ordes, ensin escaecer que la muyer siguía siendo la principal provisora de
cuidos nel ámbitu domésticu. Ye d´esta miente como, nel sieglu III de la nuesa
dómina, l´obispu de Cesárea, San Basilio, fae una orde dedicada a la creación
d'hospitales pa l'atención de persones enfermes y desvalíes. La Riegla de San
Benitu, nel sieglu VI, va ser la que va marcar definitivamente'l
desenvolvimientu de les ordes relixoses n'Europa.
Los
hospitales medievales tomaron cuatro tipo d'instituciones: les malateríes, los
asilos y hospicios pa probes, los albergues y les instituciones dedicaes al
cuidu de los enfermos indixentes. Toos ellos asitiábense cerca de les
catedrales y de los ríos. Más tarde tamién los gremios construyeron hospitales
y los cubrieron. El pesu del cuidu siempres cayía sobre les hermanes de les
distintes ordes al serviciu de los hospitales y sobre´l personal de serviciu
emplegáu na institución.
Na
Baxa Edá Media, dómina onde les miseries y les fames por falta d'alimentu taben
al orde del día, la población quedaba al pendiente de les grandes farrapones
qu'afararon Europa. xurden los caminos de pelegrinación escontra Jerusalén,
Tierra Santa y Santiago de Compostela, nos que miles de pelegrinos morrieron.
Ríquiense más sanatorios y enfermeros p'atender a los caminantes, po lo que la
ilesia sofitó la construcción d'hospitales sosteníos poles recaldaciones que pa
ello facíen. Apaecen entós les ordes militares venceyaes a la enfermería, a
l'atención y al abellugu de los pelegrinos enfermos; estes últimes foron una
consecuencia de les cruzaes a Tierra Santa. Nun esiste muncha información sobre
los cuidos qu'apurríen estos guerreros enfermeros, pero sí constancia de que
llevantaron y fornieron grandes hospitales, y qu´ellos mesmos, los caballeros,
curiaben a los enfermos.
Xurden
asina les primeres ordes militares como los Caballeros Hospitalarios de San
Xuan de Jerusalén, los Caballeros Teutónicos, la Orde de Malta, los Caballeros
de San Llázaro y los Caballeros del Santu Sepulcru, los famosos templarios. La
puxanza de les ordes militares relixoses tamién llega a España, como amuesa
l´apaición de la Orde de Calatrava, la de Montesa o los Caballeros de Santiago.
Semeya
2. Hotel Dieu
Los
primeros hospitales que se conocen son: l'Hotel Dieu de Lyon (Francia, añu
542), Hotel Dieu de Paris (Francia, añu 650) y l'Hotel del Santu Espirito de
Roma (Italia, añu 717). N'España, el primer que se conoz ye l'Hospital de
Mérida, fundáu pol Obispu de la ciudá.
N´Hispania,
cola Monarquía Goda, reinando los visigodos ente'l sieglu V y el VIII, apaez el
Fueru Xulgu o Llibru de los Xueces. Nesti llibru yá
apaez el nome de los nuesos antepasaos: “los sangradores”. Nel sieglu XIII, nel
Reinu de Castiella y dientro del códigu de Les
siete partíes del Rei Alfonso X el Sabiu, apaecen col nome d'alfaxemes,
tamién nomaos vulgarmente barberos; ellos debíen d'afaitar y sangrar en
llugares apartaos y non nes places y cais.
Yá
los nuesos antepasaos entamen a formar gremios y confreríes con una importante
crecedera de profesionales lliberales como la nuesa.
Semeya
3: Fueru Xulgu o Llibru de los Xueces
Ta
escritu que nel sieglu XIV anicien les primeres Confreríes de Barberos y Ciruxanos so la advocación de los Santos
Patronos San Cosme y San Damián. Estes confreríes yeren instituciones de calter
relixoso – benéficu, anque nos sos estatutos también dictaron normes sobre
l'exerciciu profesional, yá que pa poder exercer de ciruxanos barberos debíen
de ser esaminaos por dos ciruxanos de la confrería.
Yá
vemos que cada grupu, gremiu, asociación, etc. va dándose cuenta que non solamente
ye “curiar”, sinón qu'entamen a mirar qu'hai que saber curiar. Poro, xúntense en grupos nos que, como dicíamos
enantes, pa entrar teníen que pasar un exame y ser prebaos. Danse cuenta qu'hai
qu'estudiar y que yá nun val sólo saber.
Por
casu, en 1310 en Valencia, la Confrería
de Barberos y Ciruxanos tenía nel so exame pa tolos candidatos una parte
teórica y otra práutica. Tamién ta recoyío en Barcelona, en 1408, que los
exames na Confrería Profesional de San
Cosme y San Damián de Ciruxanos y Barberos yeren igual que los de Valencia.
En
Madrid, nel añu 1385, xunten once hospitales en unu, l'Hospital Xeneral,
estremáu en dos cases: una pa contaxosos y otra pa enfermos non contaxosos. En
1524, Carlos V establez los hospitales reales, onde concreten les funciones y
xeres del personal, ente ellos les del enfermeru mayor y los enfermeros
asistenciales. El sofitu sanitariu facíase amás en confreríes, gremios y
hermandaes.
La
capacidá pa exercer l'oficiu quedaba recoyida polos reis D. Fernando y Doña
Isabel, el 9 d'Abril de 1500, nuna Real Pragmática dictada en Segovia onde se
dicía que:
“Mandamos que los
Barberos y Esaminadores mayores, d'equí alantre, nun consientan nin dean llugar
que nengún barberu, nin otra persona dalguna, puea poner tienda pa saxar nin
sangrar, nin echar sanixuela, nin airoses, nin sacar dientes nin mueles, ensin
ser esamináu de primeres polos dichos maestros Barberos mayores personalmente,
so pena que cualesquier qu'usara de les coses susodiches o de cualesquier
d'elles ensin ser esamináu, como dichu ye, sía inhábil perpetuamente pa usar
dichu oficiu, y más pague dos mil maravedís de pena pa la nuesa Cámara [….]”
Sabemos
lo qu'estudiaben los nuesos antepasaos, asina en 1541 teníen como llibru
d'estudiu'l Llibru del arte de les comadres
y del reximientu de les preñaes y
paríes y de los neños; en 1583, el Tratáu
de la utilidá de la venae festionisin y nel mesmu añu'l Tratáu de la utilidá de la sangría”; en
1604, Prematica pola que se da la orde
nel exame de los Ciruxanos Romancistas; en 1617, la Instruccion d'enfermeros y consuelu a los inxemes enfermos. Y verdadera
practica de como s'han d'aplicar los remedios qu'ordenen los médicos. Bien
necesariu por que los enfermos sían bien curaos y provechosa a los prauticantes
de Melecina; etc.
Por
Real Cédula de Felipe V, el 29 de xineru de 1711, entamó la Clase de
Sangradores, que supunxo un primer pasu pa la xuntura de los distintos oficios
y profesionales que formaben un tou nes distintes rames de la ciencia dedicaes
al sanamientu d'enfermos.
En
1843 foron aprobaos los “auxiliares de melecina y ciruxía práuticos nel arte de
curar” y en 1846, los “ministrantes”.
Semeya
4. Llibru del arte de les comadres y del
reximientu de les preñaes y paríes y de los neños (1541). Tratáu de la utilidá de la venae
festionisin.
Estes
lleis foron sustituyíes pola Real Orde de 9 de setiembre de 1857 (la llamada
“Llei Moyano” pol ministru de Fomentu Don Claudio Moyano) que, al amparu de la
Llei Orgánica de Sanidá de 1855, reguló los oficios auxiliares sanitarios,
reconociendo a prauticantes y matrones como facedores d'un oficiu.
En
1896, el Dr. Federico Rubio y Gali abre la primer Escuela Seglar d'Enfermería
de Santa Isabel d'Hungría.
Nel País Vascu:
Falar
de barberos de pueblu, sangradores, ministrantes o de dames enfermeres llévanos
a otres dómines del oficiu sanitariu d'enfermería. Dende los barberos del
sieglu XIV hasta los actuales profesionales d'enfermería munchos fueron los
cambeos que se produxeron.
Gipuzkoa
nun foi ayena a cuanto asocedía n'otros llugares más o menos cercanos, siendo
la hestoria de los cuidos similar a la del mundu al que pertenecía. De la
enfermería intuitiva pasaron a la recibida oralmente polos mayores de cada
familia o comunidá, siendo ente los sieglos X y XV cuando entamen a identificase
les persones que, primero por nobleza, caridá y ciñu y, más tarde, por un
salariu, van dedicase a atender les necesidaes básiques de los afeutaos pola
enfermedá.
Nun
va ser hasta'l XVI cuando s'atopen escritos destinaos a formar y axuntar a les
persones que curien de los enfermos, dedicando especial atención a too cuanto
puea tar rellacionáu col partu y, seique por ello, rellacionando l'actividá col
mundu femenín. Correspuende a esta dómina la primer mención a les enfermeres
como complementu al llabor que dende'l sieglu IX veníen desenvolviendo les
ordes relixoses, como vimos nel capítulu anterior. Esta íntima rellación ente
les enfermeres y la relixón daba al so trabayu un sentíu espiritual, nel que
predominaben los sentimientos como reflexu d'una vocación. La necesidá
d´afechiscar al personal dedicáu a estos menesteres foi la resultancia de la so
casi completa sumisión a l'alministración relixosa, que yera la encargada
d'alministrar los cuidos al ser la conocedora de los remedios más eficaces. La
enfermera, subsidiaría de los relixosos, nun tenía opción a amontar les sos
conocencies y, poro, el so trabayu yera consideráu como domésticu, ensin
valoración social.
Nos
sieglos XVII y XVIII caltuviéronse vixentes les riegles que les distintes ordes
relixoses teníen dispuestes pal cuidu de les persones enfermes, y el cambéu
d'actitú de les enfermeres nun se produciría hasta'l XIX, cuando al so bon
calter empezaron a sumase les conocencies adquiríes.
En
Bizkaia, desque Don Diego López de Haro fundara la Villa, dándo-y la Carta
Puebla del 15 de xunu del añu 1300, esistía como hospital medieval el de la
Madalena o'l de San Llázaro, creándose l'Hospital de los Santos Juanes a lo
caberu del sieglu XV. Asina ta escritu nel Reximientu Xeneral del 6 d'avientu de
1645, onde s'establez qu'estes instituciones funcionaben namái como “abellugos
de naturales y vecinos de Bilbao, faltos de facienda, vieyos y miserables”.
N'Álava,
anque hai datos d'hospitales d´eremites dende 1167, el casu más conocíu ye'l de
los hospitaleros del Hospital Santiago Apóstol de Vitoria, que lo rexíen como
“hospital de sanamientu”. Son conocíos dende 1466, anque probablemente tuvieron
presentes dende la fundación del hospital en 1419. Tamién en 1514 atópense
referencies sobre l'Hospital de San José.
En
Gipuzkoa, dende 1485 hasta 1900, el númberu de centros hospitalarios o de
socorru yera bien escasu: namás ocho centros. Hai datos de 1485 del Hospital de
San Llázaro, nel barriu de San Martín extramuros en San Sebastián. De 1535
hasta 1719 conozse la esistencia del Hospital de San Antonio Abá, nel rodalada
de Santa Catalina. Darréu, en 1787, esti hospital pasó a la cai 31 d'Agostu y,
en 1888, a
l'avenida de Navarra en Mantéu. L'Hospital de Tolosa principia en 1860.
De
resultes de les yá citaes lleis de los años 1855 y 1857 entamaron a facese les
primeres asociaciones profesionales de la hestoria de la enfermería nel País
Vascu. Cuando los prauticantes salieron a la lluz xuntáronse nos Colexos de
Sangradores, estremándose d'ellos tan solo na titulación hasta que, en 1867,
torgaron exercer l'actividá si nun teníen el vistu bonu de les facultaes de
melecina, tres dos años d'estudios y práutiques hospitalaries.
Mientres
la segunda guerra carlista, en tolos batallones había un ciruxanu sangrador que,
de normal, yera'l prauticante qu'en cada pueblu taba contratáu pol Conceyu. El
llargu periodu de les distintes guerres carlistes fai que sía nel Ministeriu de
la Guerra onde más documentación atópase sobre'l particular, cuidau que
s'encargaba de nomar a los ciruxanos sangradores de cada batallón.
En
1904 afiten les carreres de prauticantes y enfermeres y, dos años dempués, la
venida a España de la reina Victoria Eugenia foi de gran importancia, cuidau
que traxo con ella la filosofía de Nightingale. Darréu, la Sección d'Homes de
la Cruz Roja xuntóse cola Sección de Señores, fundada pola reina na
Constitución del Colexu de Prauticantes
de Guipúzcoa.
Semeya
5. Hospital del País Vascu.
En
1915 espublicen el Boletín de
Prauticantes y reconocencia llegal de les enfermeres relixoses del Dr.
Rubio.
En
1917 ñaz la Federación de Colexos de Prauticantes Vascu-Navarra. Na xunta
celebrada´l 24 de setiembre de 1918, so la presidencia del señor Iglesias y col
presidente del Colexu anfitrión, señor Martínez de Pinillos, como
Vicepresidente, a ella allegaron representantes de los seis colexos norteños
(Álava, Gipuzkoa, Logroño, Navarra, Santander y Vizcaya), amás del Sr.
Monfledo, Inspector Provincial de Sanidá de Logroño, alcuerden por aclamación
los siguientes arreglos:
Llaboriar pola
dignificación del oficiu
Crear la Unión de
Prauticantes del Norte d'España
Esixir la colegiación
obligatoria
Esixir que s'ocupen
tolos puestos de trabayu qu'ordenaba la Llei
Escorrer el intrusismo
Pidir que se suprimieren
les restricciones sobre asistencies a partos
Proponer a tolos Colexos
d'España la creación del “Cuerpu de Prauticantes Españoles”.
En
1918 ñaz la Unión de Prauticantes del Norte d'España (Álava, Gipuzkoa, Logroño,
Navarra, Santander y Vizcaya) y en 1921 empecipia la Federación Nacional de
Prauticantes.
Nel
añu 1927 anició “La enfermera oficial” y dos años dempués, en 1929, fícieron la
colegiación obligatoria, camudando de forma notable la configuración del
panorama sanitariu xeneral, y de la enfermería en particular. En 1928, les
matrones axuntáronse nel Colexu de Prauticantes.
Los
acontecimientos de 1936 atoparon al país carente d'una estructura
médico-sanitaria capaz de faer frente a les munches necesidaes qu'a diariu se
presentaben. Foi necesariu improvisar hospitales y dotar a los esistentes d'un
mínimu de personal dispuesto a atender a enfermos y mancaos. Dellos conventos
fueron convertíos n'hospitales militares, siendo numberoses les ordes relixoses
que s'emprestaron a tal fin: Fíes de la Caridá de San Vicente de Paúl, Fíes de
la Caridá de Santo Ana, Hermanes de San José, Carmelites de la Caridá, Madres
de la Enseñanza, Hermanes Mercedarias, Hermanes de la Consolación, Madres del
Sagráu Corazón, Madres Irlandeses, Sierves de María, Sierves de Jesús, Madres
Clarises, Hermanitas de la Cruz, Hermanitas de los Probes…
Ante
la gran cantidá de muyeres qu'emprestaron servicios nos hospitales, con
demasiada frecuencia ensin más conocencia que la so bona voluntá, entamaron
cursinos nos que llegaron a formar 5.506 Dames Auxiliares de Sanidá Militar,
pol aciu de 116 cursinos. Amás, l'Estáu Mayor, en mayu de 1938, creó'l
Documentu d'Identidá pa Dames Auxiliares, algamando, al terminar la guerra
civil, 12.307 titulaciones ente enfermeres y auxiliares.
Anició
en 1937 La Cruz Roja del País Vascu de conformidá colo preceptuado nel Decretu
del Gobiernu Provisional del País Vascu; nel apaez como Asociación pal Socorru
de Mancaos en Campaña, Calamidaes y Siniestros Públicos.
Semeya
6. Cruz Roja San Sebastián 1947
En
1940, les empreses Michelín y Cementos Rezola foron les primeres en Guipúzcoa
en cuntar con un prauticante na so plantía y en 1942 anicia´l Seguru
Obligatoriu d'Enfermedá. Yá en 1944 créanse los Colexos Oficiales d'Auxiliares
Sanitarios con seuciones independientes pa prauticantes, enfermeres y eatrones;
la sede atopábase na cai Pedro Egaña.
Nel
añu 1953, xunten los títulos profesionales de matrona, prauticante y enfermera
nel Títulu d'Ayudante Técnicu Sanitariu (ATS). En 1954, y por Orde del 20 de
marzu del Ministeriu de la Gobernación, apruébase'l Reglamentu del Conseyu
Nacional d'Auxiliares Sanitarios. Nesi mesmu añu, y por Orde de 30 de xuliu,
aprueben los Estatutos de los Colexos Provisionales d'Auxiliares Sanitarios,
que s'estremen en tres seuciones: prauticantes, matrones y enfermeres. En 1955
constitúyese'l Colexu de Matrones de Gipuzkoa.
En
1958, y por Orde de 13 de xineru,manden a los Ayudantes Técnicos Sanitarios la
colegiación obligatoria, teniendo de colexase: na sección de prauticantes, los
ATS masculinos; na sección d'enfermeres, los ATS femeninos; y na seución de
matrones, los ATS femeninos especializaos n'asistencia obstétrica. En 1977, el
1 d'abril, xunten los Colexos de Prauticantes, Enfermeres y Matrones. En 1978,
el 10 d'ochobre, espublicen los Estatutos de la Organización Colexal
d'Ayudantes Técnicos Sanitarios, pol Real Decreto 1856/1978 de 29 de xunu.
Semeya 7. Sala d'Hospital
Yá
en 1978 celébrense les primeres eleuciones democrátiques col Colexu unificáu, y
en 1983 espublicen el Mapa Sanitariu de la Comunidá Autónoma del País Vascu y
Ordenación Sanitaria Territorial del País Vascu.
En
1979, y por Real Decretu, aprueben la torna de la Escuela d'Ayudantes Técnicos
Sanitarios (A.T.S.) na Escuela Universitaria d'Enfermería.
En
1997, el 21 de payares, la Unidá Docente d'Enfermería de Donostia tresfórmase
na actual Escuela de Diplomaos d'Enfermería de San Sebastián- Euskal Herriko
Unibertsitatea -Universidá del País Vascu.
Esistieron
tamién prauticantes de farmacia, ministrantes, enfermeros, barberos,
prauticantes de ciruxía menor, enfermeros del pabellón de contaxosos, etc.
¿Qué ye la enfermería?
Declaración
de posición del CIE adoptada en 1998 y revisada en 2004.
“L'ámbitu de la práutica
d'Enfermería nun se llinda a determinaes xeres, funciones o responsabilidaes,
sinón qu'inclúi la prestación de cuidos direutos y l'evaluación de les sos
resultancies; la defensa de los pacientes y de la salú; la supervisión y la
delegación n'otros; la direición, la xestión, la enseñanza, la realización
d'investigaciones y l'ellaboración d'una política de salú pa los sistemes
d'atención de la salú. Amás, como l'ámbitu de la práutica ye dinámicu y
respuende a les necesidaes de salú, al desenvolvimientu de la conocencia y a
les meyores teunolóxiques, ye precisu un exame periódicu pa cerciorase de que
sigue siendo coherente coles necesidaes de salú actuales y favorez unos meyores
resultaos de salú”.
Correición llingüística ya sintáutica
Sara Faedo Fernández. Llicenciada en filoloxía
hispánica
Especialista Universitaria en Llingua Asturiana
Profesora de Educación Secundaria
Tornaor / Traductor
Luis Fermín Río Martínez. Maestru
Agradecimientu especial
Luis Fermín Río Martínez
Antonio Vázquez Barrero
Sara Faedo Fernández
TRABAYU
ORIXINAL:
La
Voz d'Enfermería na Enciclopedia Auñamendi.
Primera
parte http://www.euskomedia.org/aunamendi/39190
Segunda
parte http://www.euskomedia.org/aunamendi/39190/132780
AUTORES:
Jesús Rubio Pilarte
Enfermeru
y sociólogu.
Profesor
de la Y. O. d'Enfermería de Donostia. EHU/UPV
Manuel Solórzano Sánchez
Enfermeru.
Hospital Universitariu Donostia de San Sebastián. Osakidetza /SVS
Colexáu
1.372. Pernomáu Colexu d'Enfermería de Gipuzkoa
Miembru
d'Enfermería Avanza Miembru de Eusko Ikaskuntza / Sociedá d'Estudios Vascos
Miembru
de la Rede Iberoamericana d'Hestoria de la Enfermería
Miembru
de la Rede Cubana d'Hestoria de la Enfermería
Miembru
Consultivu de l'Asociación Históricu Filosófica del Cuidu y l'Enfermería en
México AHFICEN, A.C.
Miembru
non numerario de la Real Sociedá Vascongada d'Amigos del País. (RSBAP)
No hay comentarios:
Publicar un comentario